एडिलेड नेपाली समाजको आयोजनामा नयाँ बर्ष २०८२ को शुभकामना आदान प्रदान तथा साउथ अष्ट्रेलिया भ्रमणमा आउनु भएका अभिभावकहरुको सम्मानमा बनभोज (१३ अप्रिल २०२५) भव्य रुपमा सम्पन्न भयो । साउथ अष्ट्रेलियाको क्रियाशिल मध्य पुरानो संस्था समेत रहेको समाजद्वारा आयोजित ७औ वनभोजमा अभिभावकहरुको उत्साहजनक उपस्थिति रहेको थियो । अभिभावकहरु तथा बालबालिकाहरुको मनोरञ्जनका लागि बिभिन्न खेलकुद प्रतियोगिता संचालन गरिएको थियो । भने नेपाली खानको परिकारको समेत व्यवस्था समेत गरिएको थियो । एडिलेड नेपाली विद्यालय समेतको सहकार्यमा भएको वनभोजमा अभिभावक तथा एडिलेड नेपाली विद्यालयका बालबालिका एवं तिनका परिवार सहित ११०० भन्दा बढिको सहभागीता रहेको थियो । कार्यक्रमका प्रमुख अतिथि साउथ अष्ट्रेलियाका लागि नेपाली वाणिज्यदुत दिपक धमलाले नयाँ २०८२ को शुभकामना व्यक्त गर्दै अभिभावकहरुलाई भेटघाटको मौका मिलाएकोमा समाजलाई धन्यवाद ज्ञापन गरेका थिए । कार्यक्रममा साउथ अष्ट्रेलिया सरकारको बहुसास्कृतिक आयोग मञ्जु खड्का, म्यारियन काउन्सिलकी काउन्सिलर रेनुका लामा, एनआरएनए साउथ अष्ट्रेलिया संयोजक संजय पुरीले नयाँ बर्षको शुभकामना व्यक्त गर्नु भएको थियो । कार्यक्रमकाका सभापति तथा समाजका अध्यक्ष श्याम दहालले सहयोगीहरुलाई धन्यवाद दिदै नेपालबाट आउनु भएको अभिभावकहरुलाई आफ्ना सन्तान रहेको समुदाय संग परिचत गराउने र आफु जस्तै अभिभावक संग भेटघाट गर्ने मौकाका लागि कार्यक्रम आयोजना गरिएको बताउनु भयो । अतिथि, सहयोगी र सहभागीहरुलाई कार्यक्रम संयोजक पुस्कर कोइरालाले धन्यवाद ज्ञापन गर्नु भएको थियो । पव्लिक रिलेशन अफिसर सुरेन्द्र रेग्मीले संचालन गर्नु भएको खेलकुद लगायतका कार्यक्रममा अभिभावक तथा बालबालिकाहरुले निकै सक्रियता सहभागीता जनाउनु भएको थियो । कार्यक्रमको अन्त्यमा खेलका विजयी तथा सहयोगीहरुलाई ट्रफी तथा मायाको चिनो प्रदान गरिएको थियो । बिजयी हुनेहरुमा म्युजिकल चेयरमा हिरालाल सापकोटा प्रथम र सरस्वती न्यौपाने दोस्रो, बालबालिकाको चम्चा दौडमा रिजन वखरेल प्रथम र अल्विजा सुवेदी , हाडी फोरमा हरि प्रसाद पाण्डे विजयी हुनु भएको थियो ।

एडिलेड नेपाली समाज अष्ट्रेलियाको आयोजनामा देउसी-भैलो कार्यक्रम (२०२५ अक्टोबर २१) भव्य रुपमा सम्पन्न भयो । स्थानिय Oaklands Wetland Reserve, Oaklands Park मा सम्पन्न कार्यक्रममा एडिलेडमा रहनु भएका अभिभावक सहित समुदायका सदस्यहरुको उपस्थित रहेको थियो । बालबालिकाहरुले नेपाली कला संस्कृति झल्कने नाचहरु प्रस्तुत गर्नु भएको थियो । भने गायक क्षितिज सापकोटा सहितका देउसेहरुले नेपाली मौलिक देउसी भैली प्रस्तुत गर्नु भएको थियो । साँझ ५ः३० बजेदेखि शुरु भएको कार्यक्रमको समापनमा सेल, तरकारी, अचार र चियाको व्यवस्था समेत गरिएको थियो । 

 एडिलेड नेपाली समाज अष्ट्रेलियाको तेह्रौँ बार्षिक साधारण सभा (२०२५ नोभेम्बर २ आइतबार) मिचेल पार्क स्पोर्टस सेन्टरमा सम्पन्न भयो । सभा साउथ अष्ट्रेलिया सरकारको बहुसांस्कृतिक आयोगका सदस्य मञ्जु खड्काको प्रमुख आतिथ्यमा सम्पन्न भएको थियो । साधारण सभालाई सम्बोधन गर्दै प्रमुख अतिथि खड्काले समाजले स्थापना काल देखी यहा रहेको नेपाली समुदायको हितमा क्रियाशिल रहेको बताउदै प्रशंसा गर्नु भएको थियो । भने सरकारले समाजिक संस्थाहरुलाई गर्ने सहयोग माथी प्रकाश पार्नु भएको थियो । समाजका अध्यक्ष श्याम दहालको सभापतित्व र उप सचिव जिवन भट्टराईको स्वागत मन्तव्य शुरु गरिएको कार्यक्रममा एनआरएनए साउथ अष्ट्रेलिया उपाध्यक्ष गणेश पराजुली, फेन्का साउथ अष्ट्रेलिया संयोजक पुष्कर कोईरालाले शुभकामना मन्तव्य व्यक्त गर्नु भएको थियो । सभामा अध्यक्ष श्याम दहालद्धारा प्रस्तुत समाजको गतिविधि सहितको प्रतिवेदन, समाज उपाध्यक्ष तथा एडिलेड नेपाली विद्यालय प्रिन्सिपल एलिजा ढकालद्धारा विद्यालयको प्रगति प्रतिवेदन र कोषाध्यक्ष आनन्द खरेलद्धारा प्रस्तुत आर्थिक प्रतिवेदन छलफल सहित पारित गरिएको थियो । सभामा फेन्का अष्ट्रेलियाका सह प्रवक्ता तथा समाजका पव्लिक अफिसर सुरेन्द्र रेग्मीले अध्यक्षको प्रतिवेदन संगै सदस्यहरु विच समाजका गतिविधी माथी प्रतिक्रियात्मक छलफल गराउनु भएको थियो । कार्यक्रमको अन्त्यमा समाजका उपाध्यक्ष बालगोपाल उपाध्यायले धन्यवाद मन्तव्य राख्नु भएको थियो भने कार्यक्रमको संचालन सचिव सागर श्रेष्ठले गर्नु भएको थियो । साथै समाजको आयोजनामा आइतवार साँझ स्थानिय मिचेल पार्कमा समाजको विभिन्न गतिविधिमा सहयोग पुर्याउने स्वयंसेवक तथा सहयोगीहरुको सम्मानमा बार्बिक्यु सम्पन्न भएको छ ।